На фінішнай прамой

27 жніўня 2019

Навiны АБФФ Праэкты

Сямейны праект «Тата, мама, я — футбольная сям'я» вызначае апошніх удзельнікаў рэспубліканскага фэсту.

У жніўні самы масавы праект АБФФ наведаў Пінск і Магілеў, каб правесці заключныя адборы да вырашальнай стадыі. Выніковы турнір запланаваны на 14 верасня — і на зыходзе апошняга летняга месяца каля 80 сямей змагаліся за пуцеўкі на сталічны гала-фестываль.

У Пінску на стадыене «Вална» былі прадстаўлены дзеці ажно ў чатырох узростах — і разам з бацькамі цягам чатырох гадзін высвятлялі, хто з іх больш дасканалы ў гульні. Зразумела, у такім фармаце неперарыўна бегаць у футбол складана, таму 140 удзельнікам адбору трэба было рабіць паўзы. Цягам спыненняў спаборніцтва госці фэсту альбо удзельнічалі ў эстафетах, альбо вучыліся жангляваць мячом, альбо ўдзельнічалі ў інтэлектуальных конкурсах.

Па выніках спаборніцтва сфармавалася наступная тройка пераможцаў: 3 месца заняла сям'я Супрунюкоў, другое месца зваявала сям'я Богданаў, ну а лепшай за іншых апынулася сям'я Андрэевых.

У Магілеве у аналагічным святочным антуражы подыўм аформіўся наступным чынам: 3 месца — сям'я Карасевых, 2 месца — сям'я Івановых, 1 месца — сям'я Салдаценка.

АБФФ віншуе пераможцаў рэгіянальных фэстаў — і чакае ў Мінску 14 верасня на вырашальным этапе!